تابعتا على قناة التلجرام!

معادلة طب الاسنان في كندا | NDEB

معادلة طب الاسنان في كندا ليس بالأمر الصعب ولا السهل ولكن يحتاج الى وقت ومجهود كبير هيا لنتعرف على المعادلة؟
Dr dentist

بعد ما نجحت في الهجرة الي كندا وسافرت ياتي دور معادلة شهادة طب الاسنان في كندا، فعلشان تشتغل كطبيب أسنان، او dental assistant لحد ما تعمل المعادله او تشتغل dental hygienist برضو وكل شغلانه من دول محتاجه خطوات ترخيص.

معادلة طب الاسنان في كندا

علشان تعادل شهاده بكالوريوس اسنان وانت خريج جامعه من الشرق الاوسط عندك طريقين، اما بالامتحانات او بالدخول للجامعة والاتنين بتحتاج الاول تسجل في موقع البورد الكندي الاول.

طريق الامتحانات بيكون عبارة عن :- 

  • التسجيل في موقع البورد الكندي.
  • اجتياز امتحان AFK 
  • اجتياز امتحان (ACJ) clinical Judgement.
  • اجتياز امتحان العملي (practical exam)
  • اجتياز امتحان OSCE and written.

وهنتكلم عن كل خطوة بالتفصيل إن شاء الله.

اما طريق الجامعة بيكون عبارة عن:- 

  • التسجيل في البورد الكندي.
  • اجتياز امتحان ADAT. 
  • دخول برنامج معتمد من جامعة في كندا.
  • اجتياز امتحان OSCE and written.

معادلة طب الاسنان في كندا عن طريق الامتحانات:- 

علشان تاخد ترخيص للعمل كطبيب أسنان من غير دراسة في كندا لازم تعدي ب 4 امتحان مع خطوه التسجيل في البورد لاثبات إنك اخدت طب الأسنان من احد دول العالم، والخطوات كالتالي:- 

التسجيل في موقع البورد الكندي:- 

التسجيل في البورد لما تخش على موقع البورد الكندي لطب الأسنان وتختار البلد اللي انت فيها وليكن مصر الموقع هيقولك على كل الورق اللي انت محتاجه للتسجيل واللي بيكون عبارة عن خطوتين:-

1- هتتدخل على موقع البورد وتعمل اكونت وهاتكتب شوية معلومات عنك وتدفع رسوم التسجيل وبعد كده بيجيلك ايميل انه تم التسجيل بنجاح ومعاه ملفين pdf حملهم واحتفظ بيهم علشان هتحتاجهم.

2- ارسال المستندات المطلوبة، مطلوب منك شوية ورق ومن الجامعة برضو شوية ورق:- 

- الورق المطلوب منك ظرف فية كل من:- 

  • صورة شخصية 
  • صورة من الباسبور متوثقة من السفارة الكندية.
  • صورة من رخصة قياده او اي ID مكتوب عليها اسمك ومتوثقة.
  • شهادة تخرج بالانجليزي. 
  • شهادة الامتياز بالانجليزي.
  • الشهادة التخرج الكرتون مترجمه ومتوثقة من السفارة.
  • ورقه لما بتعمل الحساب بتجيلك على الايميل بتقولك المفروض تبعت ورق اي، بتحملها وتطبعها وتعلم انك بعت كل الورق المطلوب وتمضي وتكتب التاريخ.

وبعد ما تخلص كل الورق ده هتحطهم في ظرف وتكتب علية اسمك والـ reference number وعنوان البود الكندي هتلاقية على الموقع ومن فرع DHL تبعته واسم المرسل اسمك عادي.


- الجامعه المفروض تبعت ظرف فية كلاً من:- 

  • بيان درجات أكاديمي باللغة الإنجليزية. 
  • ورقة اسمها confirmation of degree completion البورد بيبعتها ليك على الايميل بعد ما تسجل وبتكون عبارة عن ورقة وش وضهر وفية جزء انت بتملاة وجزء العميد بيملاة وبيكون عبارة عن تاريخ بداية الدراسة وتاريخ النهاية وتاريخ التخرج والعميد بيمضي وانت بتمضي وش وضهر.

وهتحط الورق في ظرف وهتكتب علية اسمك والـ reference number بتاع الاكونت بتاعك وعنوان البود في كندا وتخلي موظف الشؤون يختم علي الظرف ومن اقرب فرع DHL للجامعه ابعت الظرف كأن الجامعه اللي باعتها.

وخلى اسم المرسل يكون الجامعة، وبعد كده البورد بيرد عليك بعد 4 شهور تقريبا وبيبلغك ان ورقك تمام وتقدر تحجز الامتحانات او ورقكك ناقص ومحتاج تبعت بعض الاوراق تاتي.

امتحان AFK

 امتحان AFK exam!

امتحان AFK اختصار لـ Assessment of Fundamental Knowledge فيما معناة قياس المعلومات النظرية لدي الطبيب:- 

  •  الامتحان بيكون عبارة عن 200 سؤال mcq
  • الامتحان يقام مرتين في السنة وممكن تعمل في لندن او هونكونج او نيوزيلاند ولو انت خارج كندا.
  • تكلفة الامتحان بتكون 1000 دولار كندي.
  • ليك 3 محاولات فقط ولو سقطت لاقدر الله مش هتعرف تخش الامتحان تاني.
  • الامتحان بيكون عبارة عن نظام نجاح وسقوط فقط بمعني انت بتمتحن وبيجلك النتيجة pass or fail يا نجحت يا لاء مفيش درجة معينة للنجاح ونسبة النجاح في الامتحان 50%.

كم من الوقت تحتاج للتحصير لإمتحان AFK! 
لو انتَ مش شغال ومتفرغ للدراسة التحضير للإمتحان هياخد منك مده ما 5 الى 6 شهور ولو شغال بارت تايم ممكن المده تزيد الى 8 أشهر.

مصادر وكورسات للمذاكرة لإمتحان AFK! 
أشهر وأفضل منظمه في كندا بتدي كورسات المعادلة هيا منظمه Prep doctor وتكلفة الكورس في حدود 3000 دولار.

ممكن تذاكر مع نفسك بس الافضل الكورس وكمان المصادر المجانية مش كتير مفيش غير الدكتور محمد موسي كان عامل٤٩٤١ قناة علي اليوتيوب بيشرح فيها بغض مواضيع امتحان AFK تقدر تطلع عليها.

معادلة طب الاسنان في كندا

امتحان (ACJ) Assessment clinical Judgement؟

 امتحان ACJ بيكون امتحان نظري برضو بس اعمق شوية وبيكون مركز اكتر عن diagnosis وال treatment plan وال clinical decision making وال radiographic interpretation بمعني انتَ معاك حاله وريني هتعمل اي كطبيب أسنان.

  • تكلفة الامتحان بتكون 1300 دولار.
  • الامتحان بيتعمل مرتين في السنة ( يونيو - ديسمبر) ولازم تمتحنه جوا كندا.
  • فترة التحضير للإمتحان بتكون تقريبا حوالى 3 اشهر.
  • تكلفة الكورس للإمتحان بتكون في حدود 2000 دولار.
  • ليك 3 محاولات فقط في الإمتحان.

امتحان العملي او practical exam؟

أصعب واغلي امتحان في المعادلة امتحان عملي على يومين، بيكون مطلوب منك حوالي ١٢ او ١٣ حاجة تعملها على dummy head بالمعاير الكندية، علشان كده لازم تاخد كورس وتتدرب على الإمتحان.

  • تكلفه الإمتحان بتكون في حدود 8000 دولار كندي.
  • ‎الامتحان يقام مرتين في السنة (يونيو - ديسمبر).
  • هتحتاج وقت في حدود 6 او 8 شهور تحضير للإمتحان.
  • كورسات العملي بتكون غالية للأسف وكمان الماتريال بتاعت التدريب غالية جدآ، تكلفة الكورس هتكون في حدود 25 الف دولار كندي والماتريال بتاعت التدريب في حدود 12 الف دولار.
  • ليك عدد محاولات غير محدود لدخول الإمتحان لمده 5 سنوات من تاريخ إمتحان ACJ.
  • لازم تنجح في جميع المهارات علشان تنجح.

وللاسف لو مخدتش الكورس هتعيد الإمتحان وتكلفته الامتحان مش قليلة وكمان عامل الوقت مش في صالحك لو انت متفرغ للمعادلة ومش بتشتغل.


امتحان written and OSCE؟ 

الامتحان ده سهل ونسبة النجاح فية عالية جدًا إمتحان روتينى علشان تاخد الترخيص:- 

  • تكلفه الإمتحان حوالي 2500 دولار 
  • مده التحضير للإمتحان بتكون 3 شهور 

وبس كده بعد الإمتحان ده بتكون خدت الترخيص وتقدر تشتغل في كندا في اي ولاية تحب.


تكلفة معادلة طب الاسنان في كندا؟

تكلفة المعادلة هتكون عبارة عن تكلفة التسجيل في البورد وتكلفة الامتحانات وتكلفة الكورسات وتكلفة الاكل والسكن أثناء الدراسة.

1- تكلفة التسجيل في البورد هتكون حوالي 1200 دولار كندي.

2- تكلفة الامتحانات كلها من غير كورسات هتكون 14500 دولار.

3- تكلفة الكورسات هتكون كالتالي:- 

  • كورس امتحان AFK في حدود 3000 دولار 
  • كورس امتحان ACJ فى حدود 2000 دولار 
  • كورس امتحان العملي في حدود 25 الف دولار 
  • ماتريال التدريب بتاعت الكورس العملي 12 الف دولار وب 3000 دولار لوب اقل امكانياتك.

كده تكلفة الكورسات الاجمالية هتكون 45 الف دولار.

5- تكلفة السكن والاكل، لو حضرتك هتكون متفرغ للمعادلة بس ومش هتشتغل جنب المذاكرة وكمان مش متجوز الشهر الواحد لو هتاكل اقل حاجه هيقف عليك ب 1000 دولار وانت محتاج:- 

  • 6 شهور تحضير لإمتحان AFK 
  • و 3 شهور لإمتحان ACJ 
  • و 6 شهور تحضير للعملي 
  • و 3 شهور لإمتحان written and OSCE 

كده إجمالي 15 شهر هتحتاج فيهم 15 الف دولار اقل شئ.

تكلفة معادلة طب الاسنان في كندا هتكون في حدود 80 الف دولار كندي بالكورسات، ده بإعتبار إنك هتنجح في الامتحان من أول مرة مع التفرغ للمعادلة والمذاكرة الجيدة، وإنك مقيم في كندا بالفعل.


معادلة طب الاسنان في كندا عن طريق الجامعة؟

علشان تتدخل الجامعة وتدرس وبعد كده تتخرج ومعاك شهادة انك طبيب أسنان في كندا هتحتاج تمتحن امتحان ADAT وبعد الامتحان 

اجتياز امتحان ADAT. 

زمان كان بتمتحن امتحان AFK ولو جبت اسكور عالي اكتر من 80% بتدخل الجامعه، بس حصل تلاعب وغش في سنه 2020 في نتيجة الامتحان فالجامعات قررت متخدتش بإمتحان AFK وحطت مكانه امتحان ADAT. 

الإمتحان لسا جديد ومفيش ماتريال كفاية للمذاكرة، وكمان الامكان اللي بتدي كورس الإمتحان مكانين بس والفيد باك بتاعهم مش احسن حاجه، فانت وحظك في الامتحان، وبعد ما تنجح في الامتحان هتبدأ تراسل الجامعات.

دخول برنامج معتمد من جامعة في كندا.

حضرتك هتبدأ تراسل الجامعات علشان تحجز مقعد ليك والتنافس عالي جدًا على المقاعد دي، بالإضافة الى انها غالية جدًا، طبعا التكاليف بتختلف من جامعه الي جامعه مده الدراسة بالجامعه بتكون من سنتين الي 3 سنوات 

وتكلفة السنه بتكون عالية في حدود 100 الف دولار في السنه الواحدة دا طبعا غير مصاريف السكن والاكل والشرب بس انت بتكون ضامن إنك هتاخد الترخيص بعد ما تخلص سنتين الدراسة.

دي قائمه بالجامعات اللي ممكن تقدم فيها:- 

  • University Of alberta
  • University Of Sakatchewan
  • University Of Toronta
  • University Of Mcgill
  • University Of Manitoba
  • Western University
  • Dalhousie University

دي قايمه بالجامعات اللي تقدر تقدم في لدراسة طب الاسنان بكندا.

اجتياز امتحان OSCE and written.

امتحان روتينى ونسبة النجاح فية عالية جدًا بيتكلف حوالي 2500 دولار كندي وبياخد تحضير 3 شهور وبعد الامتحان ده بتاخد الترخيص علشان تكون طبيب أسنان بكندا.

كندا
نصيحة لو هتعمل معادلة طب الأسنان فى كندا؟ 
الأفضل اما تهاجر كندا ونويت علي المعادلة الافضل تاخد طريق الامتحانات علشان طريق الجامعة مكلف جدًا ومع الامتحانات تشتغل dental assistant وهتعرف إزاي تعمل كده، تابع معنا! 
Dental assistant in canda

إزاي تشتغل dental assistant في كندا؟ 

مبدأيا انتَ مطلوب منك كل حاجه في العيادة، بدءًا من إستقبال المريض وإجراء أشعة بانوراما وأشعة عادية، وكتابة بيانات المريض وتاريخه المرضي وشكواه الرئيسية


وصولاً إلى تقديم الأدوات للطبيب ثم تعقيم الأدوات وتنظيف العيادة، فانت كنز الدكتور ميقدرش يستغني عنك، وعلشان تعرف تشتغل لازم تاخد ترخيص بالشغل بانك تعدي إمتحان الترخيص، او الدراسة في الجامعة.

ليه اشتغل مساعد دكتور وانا دكتور؟ 

انت لما توصل كندا هتحي تدخل في سكه المعادلة هتلاقي القصة دي مكلفة اوي ما قولنا فوق سواء بقا سكه الامتحانات او سكه الجامعة غير الوقت الكبير اللي محتاجه على بال ما تخلص المعادلة

فأفضل حل هوا انك تشتغل ك dental assistant حاجه قريب من مجال الأسنان وكويسه كدخل ليك مقارنة لو هتشتغل كاجول اللي هيا محاسب في مول او موظف استقبال، ولكن للأسف لازم ترخيص علشان تشتغل.

مرتب مساعد طبيب الأسنان فى كندا؟ 

مرتب مساعد طبيب الأسنان في كندا في الساعه يتراوح ما بين 25 الى 40 دولار في الساعه على حسب المقاطعة وهتقبض في حدود 4000 دولار كندي بعد الضرايب في حين ان الشغلانه الكاجوال اقصي مبلغ هتقبضه هيكون في حدود 2000 دولار.

‎خطوات الحصول على ترخيص للعمل كمساعد طبيب أسنان؟

علشان تاخد الترخيص في طريقين:- 

1- طريق الامتحانات

  • هتسجل في البورد الكندي للمساعدي أطباء الأسنان.
  • هتخش امتحان نظري على بعض معلومات طب الأسنان.
  • هتخش امتحان عملي في 9 مهارات.

بعد ما تنجح في الامتحان بتاخد الترخيص وتبدأ تدور على شعل.

2- طريق كورس في الجامعة:-

  • بتاخد كورس في الجامعة وبعد التخرج من الكورس بيكون معاك رخصة العمل كمساعد طبيب أسنان.

طريق الحصول على الترخيص بالامتحانات؟

1- التسجيل في البورد الكندي:- 

هتخش على موقع البورد بتاع dental assistant وهتلاقي الايميل بتاعهم، هتبعت لهم ايميل وتقولهم انك طبيب أسنان اجنبي من دولة أخرى وعايز تشتغل كمساعد طبيب أسنان هيبعتولك الورق المطلوب وبيكون:- 

1-إثبات انك طبيب أسنان.

  • وده بتعملة عن طريق WES اللى كنت عملتة في الهجرة هتعملة upgrade وتخلية course by course.

2- باسبور أو رخصة قياده، المهم ID ليك وموجود فية صورتك ولازم تكون موثقة (notarized) من اي مكتب جوا كندا عنده الختم او من اقرب سفارة كندية.

3- شهادة التخرج بالانجليزي وبيان الدرجات بالانجليزي ويكون notarized برضو.

4- هيبعتولك فورم طويلة كده بتكتب بياناتك فيها من اسم الجامعة وايم الكورس وسنه التخرج وشوية حاجه كده بتعلم عليها صح وخلاص.

5- هتعمل تحويل بنكي لل dental assistant board تقريبا ب 300 دولار وهيدك زي ايصال دفع بتحطه مع الورق بتاعك.

6- هتبعت ورقك بالبريد للعنوان بتاعهم اللي هتلاقية على الموقع وهما هيردوا عليك بعد 4 اسابيع وبيبعتولك username و password على الموقع وتقدر ساعتها تخش ونحجز الإمتحان.


- لو انت مسجل في بورد الأسنان كطبيب أسنان مش هتحتاج غير اسكرين شوت من موقع بورد الأسنان وهتبعتها لبورد مساعدى اطباء الأسنان وبس كده ومش هتحتاج كل الورق اللي فوق.

2- التقديم لإمتحان النظري؟

امتحان نظري بيقيس المعلومات النظرية بيكون فيه كتب كتير المفروض تذاكرها، بس بشهاده ناس كتير في كتاب واحد هوا اللي مهم وفيه كل القصة دي.

الكتاب اسمه (Modern dental Assistanc) والكتاب كبير في حدود 1000 صفحة بس مش صعب هو شغال بمبدا من كل زهرة بستان.

يعني شوية dentation على anatomy وحاجات مش معقدة واللي هيبقي جميل ومفيد الجزء بتاع التامين والجزء بتاع Infection control هيبقي مفيد فعلا وهتعرف منوا حاجات جديدة.

الكتاب في منه نسخة pdf والامتحان بيتعمل 3 مرات في السنة بس وتكلفة الامتحان في حدود 200 دولار والنتيجة بتتطلع بعدها ب 6 اسابيع تقريبا.

3- التقديم لإمتحان العملي؟ 

تقدم علي العملي عبارة عن امتحان من 9 مهارات:- 

  • Dental x ray
  • Rubber dam
  • Topical anesthesia application
  • Removal of stains
  • Flouride application 
  • Impression alginate
  • Pulp capping application 
  • Matrix and widge
  • Pit and fissure sealant
  • Tooth whitening using a try

أصعب مهارة فيهم بتكون x-ray علشان بتكون مختلفة عن اللي احنا متعودين عليه علشان هما بيأخدو x-ray بال parallel Technique بس هيا سهلة، وهتتعلمها بسهولة.

تكلفة الامتحان في حدود 1700 دولار، وليك 3 محاولات بس لو لا قدر الله منجحتش لازم تدخل جامعة عشان تدرس وتاخد الترخيص.

لو سقطت في مهارة واحدة او اكتر، عندك خيارين:- 

  • بتعيد المهارة دي بس والمهارة الواحدة ب 175 دولار زائد 100 دولار بتاعت الابليكشن وتعيد الامتحان في المهارة دي.
  • او ممكن تقدم في الجامعة وتقولهم انا نجحت مثلا في 6 مهارات ومعرفتش أعدي 3 بتقضي معاهم حاجه زي workshop معرفش لمده قد اي بس تقريبا يوم، وبعد ما تخلص الجامعة بتديك خطاب انك بتعرف تعمل المهارة دي وتقدر تقدمه وتاخد بيه ترخيص للعمل.

فيه ترخيص بتاخده إسمه provignal license ترخيص للعمل داخل الولاية فقط، بتاخده أما تنجح في 5 مهارات تقريبا، اول ما تاخده ابدأ دور على شغل.


الدراسة في الجامعة لتصبح dental assistant؟

في ولاية اونتاريو ممكن تاحد كورس في الجامعة وتطلع منه Dental assistant الموضوع مضمون بس للاسف مده الكورس مش قليلة تقريبًا سنة وبعد الكورس بتاخد الترخيص ودي بعض تفاصيل الكورس:- 

  • الـ Willis collage مدة الدراسة سنة.
  • الـ Algonquin College مدة الدراسة سنة.

وبتتخرج كمساعد طبيب أسنان تقدر تاخد x-ray وتركب رابر دام بس منصحش إنك تضيع سنة في الدراسة خصوصا ان الامتحانات مش صعبة.


عيوب الشغل كمساعد طبيب أسنان؟

  • بيكون صعب تلاقي شغل خصوصا لو انتَ راجل، اما لو انتِ بنت فالفرصه بتاعت الشغل هتكون افضل.
  • الشغل مرهق جدًا لابعد الحدود وفكرة انك كنت دكتور في بلدك وبقيت مساعد طبيب بيكون مرهقة. 
  • متكتبش في ال cv ان طبيب أسنان علشان مش هتلاقي شغل بسهولة لو كتبت إنك طبيب أسنان.
  • العائد المادي مش افضل حاجه ولكن كويس مقارنه بالشغل الكاجوال.

واكرر النصيحه لما تهاجر لكندا وعايز تعمل المعادله الافضل تشتغل ك dental assistant لحد ما تظبط امورك وبالمرة تكون خدت على جو العيادات في كندا وبعد كده ابدأ في إمتحانات المعادلة وطريق الدراسة رخم وغالي جدًا رغم إنه مضمون اكتر من الامتحانات.

مواضيع قد تهمك!

كده فاضل خطوات إزاي تاخد ترخيص dental hygienist في كندا هاتكلم عنه في مقال اخر إن شاء الله، ولو إحتجت أي سؤال تقدر تسأل في الكومنتات او في جروب the roud to NDEB، متنساش تشارك المقال مع اصحابك انا دكتور دينتيست سلام.

Cookie Consent
We serve cookies on this site to analyze traffic, remember your preferences, and optimize your experience.
Oops!
It seems there is something wrong with your internet connection. Please connect to the internet and start browsing again.
AdBlock Detected!
We have detected that you are using adblocking plugin in your browser.
The revenue we earn by the advertisements is used to manage this website, we request you to whitelist our website in your adblocking plugin.
Site is Blocked
Sorry! This site is not available in your country.