كل المعلومات الواردة فى المقالة من تجارب أشخاص نجحت فى الوصول إلى ألمانيا سواء كان هذا الشخص سوري أم مصري، والطريق كلة واحد وبإذن الله تعرف الخلاصة فى معادلة طب الاسنان في المانيا.
معادلة طب الاسنان في المانيا!
مبدأيا علشان تسافر لألمانيا وتبدأ فى إجراءات معادلة طب الاسنان في المانيا محتاج فيزا، وأنت كطبيب قدامك كذا خيار عندك فيزا دراسة أو فيزا سياحة (شنجن) أو فيزا لم شمل عائلة أو لجوء سياسي أو فيزا لغه طبية أو فيزا 17a ودي أفضلهم واللى هنتكلم عنها بالتفصيل في المقال.
الطريق الى ألمانيا محتاج اي!
- إجادة اللغة الألمانية.
- معرفة تكـاليف السفـر والعمل إلى ألمانيا.
- طرق المعادلة الألمانية الممكنة.
- الأوراق المطلوب تحضيرها للمعادلة.
- خطوات المعادلة الألمانية.
إجادة اللغة الألمانية!
أهم شرط مطلوب وهو اللغة، اللغة الألمانية بها 6 مستويات بداية من A1 - A2 - B1 - B2 - C1 - C2 والمستوى المطلوب للعمل هو B2 وفية بعض الولايات بدأت تطلب أقل مستوى C1.
إزاي أتعلم ألماني؟
السؤال الأزلى، إزاي أتعلم ألماني، فيه 3 طرق ممكن تتعلم بيهم ألماني؟
- طريقة ذاتية: هتتعلم من الألف للياء بنفسك بالاعتماد على مصادر موجودة مجاناً على النت، وتفاصيل خطة التعلم الذاتى هنـــــــــــــــــــــــــــا.
- ثاني طريقة وهي طريقة كويسة لو فشلت تتعلم لوحدك و مش معاك فلوس تدفعها للمعاهد، فيه مدرسين كتير بيدوا حصص ألماني أون لاين وفيه مدرسين في القاهرة بيدوا بالحصة وبيأهلوا لأمتحان اللغة.
- معهد لغة: فيه معاهد تعليم لغة ألمانية في مصر كتير، الأفضل والأغلى معهد جوته، المستوى الأول ب 5 الآف جنيه وده الموقع الرسمي.
فيه معاهد تانية أرخص بس مش نفس جودة التعليم في جوته
-------------------
بعد ما تتعلم ألماني مطلوب منك شهادة المستوى اللي اتعلمته
بعد ماتوصل لمستوى B2 وده حسب مجهودك ومذاكرتك ممكن ياخد حوالي 6 - 8 شهور بتثقدم على امتحان في معهد جوته ولو نجحت بتاخد شهادة بالمستوى ده تقدمها مع باقي الورق، ممكن تذاكر لوحدك او في معهد او مع مدرس لكن في النهاية لازم تمتحن في معهد جوته علشان شهادته هي الوحيدة المعتمدة في كل ألمانيا، مبدئياً تكلفة امتحان مستوى B2 هي 2900 جنيه.
تكلفة معادلة طب الاسنان في المانيا؟
التكاليف مقسمة على حاجات كتيرة وإحسب كويس علشان ماتتصدمش بعد ارتفاع اليورو.
- تكاليف تعلم اللغة + تكاليف امتحان مستوى اللغة.
- تكاليف تحضير الأوراق + توثيقها.
- تكاليف المعيشة والحياة في ألمانيا لحد ما تلاقي شغل.
- تكاليف المعادلة.
أولاً تكاليف تعلم اللغة والإمتحان!
لو انتَ من الناس اللى مش بتعرف تتعلم ذاتيا لوحدها ومحتاج أكاديمية تعلمك ألمانيا، فية معهد جوتة فى القاهرة متخصص فى تعلم اللغه الألمانية بس للأسف غالى مش اقل من 15 ألف جنية.
أما لو انت من الناس اللى بتعرف تذاكر لوحدها، شيل التكلفة دي من الحسبة.
مدة فترة دراسة اللغة هتكون من8 شهور إلى سنه سواء اتعلمت فى المعهد أو اتعلمت ذاتيا، دة لو انتَ استمريت مثلا 4 ساعات في اليوم تعلم لغة، ولو انتَ مشغل وصغب تكمل الاربع ساعات ممكن سنه ونص تكون فترة كويسة.
تكلفة امتحان اللغة لمستوى B2 ب 2900 جنيه "معرفش زاد ولا لاء" من معهد جوتة، وممكن تحتاج تاخد حصص مع مدرس قبل الامتحان بتأهلك للامتحان بحوالي ألف جنيه، وللأسف دة المعهد الوحيد فى مصر اللى شهادتة معتمدة فى ألمانيا.
تكلفة تهجز الأوراق وتوثيقها!
تكلفة استخراج شهادات التخرج حوالي 500 جنيه وتكلفة ترجمتها للغة الألمانية المترجم بياخد 150 جنيه على الورقة الواحدة.
توثيق الورقة الواحدة في السفارة الألمانية ب 25 يورو، وأحيانا بيعتبروا كل شهادات التخرج اللي إستخرجتها من الجامعة ورقة وأحدة لو مستخرجة أنجليزي وبيوثقوها بسعر ورقة.
باقي الأوراق زي رخصة المزاولة وشهادة الميلاد والفيش وشهادة حسين سير وسلوك .. الخ بتتعامل كل ورقة على حدى بـ 25 يورو لو انجليزي و 50 يورو لو عربي مترجمة لألماني بالعربي إعمل حسابك مش أقل من ١٠ آلاف توثيق ورق بس وترجمته لو ناوي تترجمه ألماني.
تكاليف الحياة والمعيشة في ألمانيا!
من ضمن الشروط علشان تعرف تسافر إنه لازم يكون عندك حساب بنكي مغلق فيه مبلغ 12 الف يورو، انت مبتدفعش فلوس، ده ضمان مالي إنك تقدر تعتمد هناك على نفسك من سكن وأكل ومواصلات بالمبلغ لحد ماتلاقي شغل فى الفترة اللى بتعادل فيها والتي قد تصل الى سنتين.
ممكن متصرفش منهم وتشتغل مساعد طبيب أسنان أو طبيب أسنان بتصريح مؤقت "ودة صعب" أو لو ملقتش شغل فى العيادات والمستشفيات ممكن تشتغل بنظام الساعه كطلاب ألمانيا من غير تصريح عمل لو إنتَ طالع بفيزا 17a زي تقف فى سينما كدة أي مصدر دخل.
تكاليف المعادلة!
المعادلة تكلفتها بتكون 2000 يور ممكن صاحب العمل يدفعهم مكانك، وممكن انت تدفعها وتستردها بعدين من الضرائب.
التصريح المؤقت للعمل كطبيب أسنان فى ألمانيا بدون معادلة:- هاتكلم عنه فى كمان شويه.
طرق المعادلة فى ألمانيا!
في البداية فيه طريقين لمعادلة الشهادة
1- الطريقة الأولى إنك بتقدم أوراقك مترجمة باللغة الألمانية وموثقة من السفارة الألمانية في بلدك، للجهة المسئولة في الولاية أو المقاطعة اللي انت فيها والرد بيجيلك بعد عدة شهور، دي الطريقة الصعبة ودايماً بيجيلك رد إنه شهادتك غير معادلة للشهادة البكالريوس اللي بيحصلوا عليها في جامعات ألمانيا وفيه نقص في المحتوى التعليمي أو عدد الساعات الدراسية اللي درستها في جامعتك، الطريق صعب جداً ونسبة نجاحه 5 % فلذلك كله بيتجه للطريق التانى.
2- معادلة شهادتك عن طريق التقدم لإمتحان المعادلة الألمانية
بيكون إمتحان شامل لكل أقسام طب الأسنان باللغة الألمانية وبيكون فيه جزء عملي وتحريري وشفوي، وبيحتاج تحضير عدة شهور حسب قدراتك في الانجاز وإذا نجحت في الإمتحان بتحصل على ترخيص مزاولة مهنة دائم في كل ولايات ألمانيا وتبدأ مرحلة الاختصاص.
دة نبذة بسيطه عن المعادلة الألمانية وطرق معادلة الشهادة فى ألمانيا.
الأوراق المطلوبة لمعادلة طب الاسنان في المانيا!
الأوراق المطلوبة للتحضير لامتحان المعادلة:-
- شهادة بكالريوس.
- شهادة إمتياز.
- شهادة عدد ساعات دراسية.
- بيان درجات بتستخرجها من جامعتك باللغة الإنجليزية.
- ترخيص مزاولة المهنة في بلدك.
- فيش وتشبيه لازم ميكونش عليك احكام جنائية مسجلة في بلدك.
- حساب بنكي في مصر فيه مبلغ لا يقل عن 4500 يورو.
- شهادة ميلاد.
- شهادة حسن سير وسلوك من النقابة في بلدك.
- شهادة خبرة أو ماستر ( مش شرط أساسي لكنها بتقوي وكل ماتزيد سنوات خبرتك بتفيدك)
- شهادة إتمام الثانوية العامة.
كل الأوراق السابقة لازم تكون مترجمة ألماني أو انجليزي وعليها ختم وزارة الخارجية وختم السفارة الألمانية.
خطوات المعادلة بالتفصيل!
- إجادة اللغه الألمانية واخد شهادة بالامتحان من معهد جوتة.
- تحضير اوراق التخرج وترجمتها للغة الألمانية وتوثيقا من السفارة الألمانية.
- عمل cv باللغة الألمانية وتخدد الولاية اللى هتسافرلها عن طريق مراسل المستشفيات والعيادات ومعرفة الفرص المتوفرة علشان ممكن تشتغل من غير معادلة بحاجه اسمها تصريح مزاولة مؤقت أو الـ Beruferlaubnis وهتكلم عنه كمان شوية.
- إختيار الولاية معظم الناس بتختار برلين او تورجن علشان دول سهل تجيب منهم البشايد وده الموافقه من نقابة الأسنان بالمانيا لتقديم لامتحان المعادلة "هاتكلم عنه كمان شوية ولية الـ 3 ولايات دول" والبشايد ده شرط من شروط التقديم للفيزا الأطباء 17a.
- بتبعت لنقابة الأسنان فى الولاية اللى انتَ اخترتها أوراقك علشان تاخد البشايد وبنتظر الرد، بعد كام اسبوع بيجي الرد على هيئة جواب إنهم إستلموا ورقكك علشان تاخد البشايد الجواب ده اسم" Eingangsbestätigung" بتاخدة وتقدم فى السفارة بية على فيزا 17b لو إنت عايز تسافر بسرعة، عايز تستني اما البشايد نفسه يطلع عادي براحتك، بس خد بالك البشايد بيغيب ممكن تصل لـ 6 شهور أو سنة.
- بتقدم الورق في السفارة للحصول على فيزا الأطباء 17a والموظف هيراجع ورقكك، ويبعتلك الرد بمعاد مقابلة علشان تاخد الفيزا، بتعمل المقابلة وبتتقبل انشاء الله.
- بتحجز تذكرة سفر لألمانيا وتسافر وتدرس لحد ما يطلعلك البشايد بشكل رسمي من الولاية اللى قدمت فيها وبكده ممكن تتدخل الإمتحان فى أي وقت.
- ممكن تقدم على ترخيص مزاولة مهنه مؤقت بعد ما تنجح في إمتحان اللغة الطبية، وتشتغل بية كطبيب أسنان بحيث تجيب مصاريفك وانت بتتعلم لإمتحان المعادلة.
- الإمتحان بيكون عبارة 3 أجزاء:-
- جزء نظري: بيكون عبارة عن حالة وانتَ بتكتب البروتوكول بتاع العلاج، طبعا فية بروتوكول للعلاج انت بتراجعة قبل الامتحان والموضوع بيكون سهل إنشاء الله
- جزء شفوي: الأصعب، انتَ بتخش على لجنة مكونة من 3 اشخاص بيسألوك فى كل فروع طب الأسنان طبعا باللغه الألمانية طبعا فى أسئلة كتير بتتكرر بس برضو اللجان كتير وممكن تقابل أسئلة جديد فلازم تكون مستعد.
- جزء عملى: بيكون عبارة إمتحان 5 او 6 ساعات بيكون مطلوب منك حالتين حشو عادي وحالة حشو عصب وحاله كوبري بالمؤقا بتاعها والمقاس، مش عارف فية حاجه تانية ولا لاء، هاسال واعدل المقال بباقي التفاصيل.
- بتقعد بعد الإمتحان 3 شهور تقريبا وتطلع النتيجه وتاخد مزاولة المهنة الألمانية وتبداء تشتغل براحتك.
العمل كطبيب مساعد أو الـ Beruferlaubnis.
دة تصريح للعمل كطبيب مساعد أسنان مع طبيب فى عياده الخاصة، أو العمل كطبيب مساعد فى مستشفى التأمين، لحين الانتهاء من المعادلة، وعلشان تحصل عليه لازم تعمل تدريب لمدة شهرين فى مستشفى "Hospitation" بعد كدة تقدم علية.
ملاحظه: تقريبا القانون اتعدل وضافوا علية لازم تعدي من إختبار اللغة الطبية (FSP) علشان تاخد الترخيص.
وميزة هذا الترخيص إنه تقدر تشتغل كطبيب مساعد مع اي طبيب أسنان عنده عيادة خاصة أو في مستشفى وده اسمه Praktikum وبكدة تحصل على راتب ومش هتحتاج تصرف من الـمبلغ اللي رايح بيه تاني، الراتب بيكون فى حدود 1100 يورو.
ماهوالـ Hospitation ؟
معناه بالعربي " تسكين " وهو بالفعل تقوم بعمل مقابلات في مستشفات فيها أقسام أسنان تطلب منهم هوسبتاسيون لمدة شهرين.
مافائدته!
1- اولاً خلال هذا الفترة مسموح لك بمشاهدة شغل الأسنان في ألمانيا بجانب طبيب الأسنان المقيم في المستشفى هيديك خبرة كويسة كبداية عن نظام التأمين والعمل هناك.
بعض المستشفيات بتوفرلك سكن وأكل مجاناً ودي ميزه كبيرة أوي، عيبها الوحيد إنه غير مدفوعة الأجر يعني مابتحصلش علي اي مبلغ (ملحوظه احيانا مستشفيات مبتقدمش سكن ولا أكل).
2- الميزة الأكبر في الهوسبتاثيون هو إنك بعد قضاء شهرين بتاخد ورقة من رئيس القسم تفيد إنك حضرت شهرين عندهم وبعدين تروح مكتب إستخراج تراخيص مزاولة المهنة بتقدم أوراقك، والورقة اللى خدتها من رئيسية القسم وتطلب الحصول على مزاولة مهنة مؤقت Beruferlaubnis بيروف إيرلاوبنس وتشتغل كطبيب مساعد.
عيوب العمل كمساعد طبيب أسنان:-
- الترخيص مدتة سنتين ولازم فى خلال السنتين دول تقدم على المعادلة وتكتحن وتاخد الترخيص الدائم.
- مش سهل ابدا إنك تلاقي شغل كطبيب مساعد بل فى بعض الولايات لا يسمح لك بالعمل فقط المشاهدة، بس متيأسش وراسل العيادات كل يوم حتي تحصل فرصه عمل.
ملاحظه: العمل كمساعد طبيب أسنان مش معناه إنك مش هتشتغل على مراضي وفقط تمسك الشفاط او تحضر الأدوات دي مش شغلتك، انت هتشتغل كطبيب اسنان تحت التمرين، بمعني إنك تقدر تعمل اي حاجه طبيب الاسنان بيعمها من حشو وخلافة بس مينفعش تتواجد فى العيادة لوحدك ولازم معاك دكتور مشرف عليك.
البشايد أو Defizitebescheid:-
هو باختصار قرار بموافقة نقابة الأطباء في ألمانيا بالتقدم لامتحان المعادلة الألمانية، في ولاية معينة ولابد من الحصول علية للتقدم لأداء إمتحان المعادلة.
خطوات الحصول على البشايد :-
كل نقابة أطباء في كل ولاية ليها شروط مختلفة عن ولاية تانية فمفيش شروط موحدة، ممكن تراسل النقابة فى الولاية اللى ناوي تروحها وتعرف المطلوب لكن فيه حاجات مشتركة او أساسية هنتكلم عنها :-
1 - شهادات جامعية (تخرج-امتياز-تقديرات)
2 - فيش وتشبيه موجه لألمانيا
3،- حسن سير وسلوك من النقابة
4 - مزاولة مهنة موجه لألمانيا من الوزارة
5- شهادة ميلاد
6- صورة جواز سفر ساري
7 - شهادة لغة B2
8 - شهادة خبرة ان وجد
9 - كشف طبي
10 - لا حكم عليه
رقم 9،10 بتعملهم في ألمانيا
العيوب:-
1- المدة الكبيرة علشان تحصل على البشايد اللى هيا قانونياً بتوصل إلى 4 شهور وقد تصل الى 8 أشهر.
2- العيب رهيب فى البشايد إن حاليا فيه 13 ولاية بتطلب عقد او وعد عمل ضمن الشروط شئ مستحيل لينا واحنا في مصر اصلاً، لكن فيه 3 ولايات في ألمانيا مبتطلبش عقد عمل وهم "تورنجن - برلين - وبايرن ميونيخ" وفي مقابل كده بتمضي على اقرار بمزاولة المهنة في ولاية معينة لحد ماتاخد الابروباتسيون او ترخيص المزاولة الألماني.
بعد ما تخلص الورق المطلوب منك وترجمته وتوثيقه من السفارة الألمانية، بتراسل الولاية اللي انت هتروحهم وغالبا بيكون ولاية من التلاته دول مبدأيا عشان مبيطلبوش عقد عمل، وبعد مابيردوا عليك بتبدأ تجهز ورقك وترسله عن طريق شركة شحن سريع DHL او TNT بلاش استرخاص في البريد المصري عشان ورقك مهم جدًا بالنسبالنك.
بيردوا عليك بعدها بكام يوم او اسبوع انهم استلموا ورقك وهيدرسوه ( وده اسمه جواب Eingangsbestätigung) وفيه ناس قدمته في السفارة مع الورق وخدت الفيزا بيه لكن مش شرط ممكن يطلبوا منك البشايد نفسه.
الموظفين فى ألمانيا بيدرسوا الورق حسب مزاجهم ممكن شهر اتنين تلاته اربعة خمسة انت وحظك وده عيب رهيب لانك بتكون استزفت فلوس وطاقة ومعندكش صبر بعد فعلاً بعد تعب اللغة وتكاليف الورق والقرف في الاستخراج والتوثيق.
بيجيلك البشايد بالشكل الاتي:-
رد شامل ان ورقك كامل او ناقص وتقدم الناقص منه قبل ماتدخل امتحان المعادلة في ألمانيا،بمعنى انه بيطلع لك بشايد حتى لو ليه حاجة ناقصة وهتكملها بعدين لما تيجي ألمانيا.
فيزا 17 a
الاسم الأساسي § 17a أو Anerkennung ausländischer Berufsqualifikationen.
الغرض من الفيزا : تأهيل الأطباء اللي بيزاولوا المهنه خارج ألمانيا للعمل داخل ألمانيا، الفيزا دي بديل للفيزا البحث عن عمل لأن خلاص فيزا البحث عن عمل اتلغت خلاص للأطباء بشكل نهائي.
هنتكلم عن تلت حاجات أساسية شروط ومميزات وعيوب الفيزا
شروط الفيزا :-
- لغة B2
- شهادات جامعية + شهادة الامتياز + تقديرات
- تمويل بنكي طوال مدة الفيزا بواقع 800 يورو شهرياً.
- مزاولة مهنة في بلدك.
- حجز كورسات لغة طبية ودورات تأهيلية لامتحان المعادلة
- البشايد Defizitebescheid.
مميزات الفيزا:-
1- أولاً مدتها 18 شهر ويمكن مدها بسهولة داخل ألمانيا طالما فيه جدية وفيه حجز امتحان او كورس.
2- ممكن تحصل من خلال الفيزا دي على منحة شهرية من مكتب العمل في الولاية التابع ليها(منحة كورسات مجاناً - منحة سكن - منحة مواصلات - ...) يعني من الاخر بيصرفوا عليك عشان يأهلوك للعمل هناك وطبعاً لانهم هيستفيدوا منك بعد كده من الضرايب، والمنحة متاحة للمصريين.
3 - الفيزا تسمح لك بالعمل خارج القطاع الطبي مثل طلبة الجامعة بالساعات ( لو معرفتش تشتغل في الاول في مستشفى او عياده يعني) وبدون استخراج تصريح عمل
عيوب الفيزا:-
1 - البشايد واللى بياخد وقت طويل جداً في الرد وممكن تقدم الرد على تقديم ورق البشايد واللى إسمه (Eingangsbestätigung) لو عايز تسافر ألمانيا بسرعة ومتسناش البشايد نفسه.
2 - التمويل البنكي لأن لو عايز 18 شهر محتاج حوالي 12 الف يورو ولكن ممكن تاخد شهور اقل عادي وممكن تحل مشكلة الحساب البنكي بورقة كفالة مالية من شخص شغال في ألمانيا.
رواتب أطباء الأسنان فى ألمانيا!
- الطبيب المساعد أو Vorbereitungsassistenz Zahnarzt ومعناها طبيب أسنان في فترة التحضير وهي مدة سنتين في الفترة دي بيكون طبيب االسنان مصرح بالعمل كطبيب أسنان ولكن لا يحق له فتح عيادة أسنان ويشترط وجود طبيب اسنان معه تصريح دائم بالعياده وهو المسئول القانوني لشغلك وبيكون مرتب الطبيب في الفترة دي، الصافي 1100 الى 1300 يورو بعد الضرائب .
- طبيب أسنان عام حصل على البروباتسيون (تصريح المزاولة الدائم) ويحق له العمل بدون اشراف وفتح عيادة مباشر والمرتب في تلك الحالة بيرتفع ليبدأ من 2500 يور كحد ادنى بعد الضرائب والطبيب لديه الحق في الاتفاق في بنود العقد بالمشاركة في االرباح بنسبة معينة بعد تحقيق دخل معين.
- طبيب اسنان حصل على مزاولة مهنة طب الأسنان الدائم وعمل 3 سنوات، سنتين في عيادة تخصصية وسنة في مستشفى جامعي واجتاز امتحان التخصص في النقابة بعد ثلاث سنوات من المعادلة يمكن أن يأخد الطبيب راتب ثابت قد يصل الى 3000 يور بعد اقتطاع الضرائب، بالإضافة الى نسبة من الأرباح.
نصائح هتفيدك؟
إدخل على جروب الأطباء السوريين فى ألمانيا من هنـــــــا واقرا البوستات المثبتة، وجاوب على أسئلة الدخول علشان يقبلوا إنك تنضم، الجروب ده كنز وفيه مصادر للمذاكرة والمعادلة ومعلومات عن افضل الولايات في التقديم والامتحانات.
وإدخل على جروب Dentist escape plan وبعد ما تخلص اللغه وتوصل لمستوي B2 وتاخد الشهادة، تواصل مع الدكتور صالح عبود من الجروب وإطلب منه يدخل فى مجموعه طب الأسنان على الواتس للمصرين فى ألمانيا اللى خلصوا اللغة وإسالهم عن الولايات واعرف مزايا وعيب كل ولاية.
إختيار الولاية خطوة مهمة إسال فيها اي حد تعرفه سواء على السوشيال ميديا او أرض الواقع علشان كل ولاية ليها إمتحان خاص بيها قد يكون سهل وقد يكون صعب، وفيه ولايات فترة الإنتظار فيها قد تصل الى سنتين وفى الاخر بيرفضوا.
ممكن تخلص التعديل فى 6 شهور ووممكن تقعد لسنتين كل ده راجع للولاية، فإختار الولاية صح وشوف جروب أطباء الأسنان السوريين بألمانيا كاتبين فيه مزايا كل ولاية وعيوبها.
دي خطة تعلم ألماني داتيا من مصادر موجود علي الانترنت لاول 3 مستويات لو انت بتفكر تذاكر مع نفسك، من هنـــــــا.
الخلاصة؟
علشان تسافر لألمانيا وانت لسا مش متعلم لغة، اعمل حسابك على مدة زمنية 3 سنوات، سنه للغة وسنتين للمعادلة.
التكاليف بتختلف لما بتسافر لقيت شغل ولا لاء، بس احسب التكاليف تعلم اللغه وتوثيق الورق وترجمته وعمل نسخة طبق الاصل الاتنين مثلا كدة بـ 50 الف جنية مصري تقريبا.
لما بتسافر الشهر بيقف عليك اكل وشرب وسكن فى حدود 600 الى 800 يور فإعمل حسابك شهرين اقل واجب على بال ما تلاقي شغل 1500 يورو، وشوف بقا هتقدر تتحمل المصاريف دي كلها ولا لاء.
واخيرًا قرار السفر مش سهل، تريث وإحسبها براحتك وشوف هل هتقدر تذاكر لمده 3 سنين وتدفع فلوس قد تصل الى 12 الف يورو كورسات وتذاكر سفر واكل شرب وسكن 3 سنوات لو ملقتش شغل، أقصى مبلغ انشاء الله.
=================================================================
إن شاء الله هأنزل مقالة لأشهر الاسئلة عن السفر لألمانيا وطرق التخصص هناك، لا تنسونا من صالح الدعاء ولا تنسوا الدعاء لاخوننا وأهلنا فى غزة كان الله فى عونهم.