كندا غير باقي الدول في معادلة طب الأسنان، يعني مثلا معظم الدول التانية الافضل تبدأ في المعادلة وبعد كده تهاجر، في كندا بقا الافضل تهاحر بعد كده تبدأ المعادلة علشان تكلفة المعادلة بتكون عالية جدًا لو انتَ خارج كندا واللي هتعرفها بالتفصيل إن شاء الله.
هجرة اطباء الاسنان الي كندا!
فية كذا طريق للهجرة اطباء الاسنان الي كندا وتقدر تعرفهم من الموقع الرسمي للهجرة، ولكن أشهر الطرق للسفر للكندا والمضمونه، وهيا:
- بعقد عمل.
- او فيزا دراسة.
- او لجوء.
- او Express entry.
الحصول على عقد عمل فى كندا !!
الحصول على عقد عمل صعب وتقريبا مستحيل بالنسبة لنا كأطباء أسنان اولاً يجب عليك إنهاء معادلة طب الأسنان لكي تمارس المهنه في كندا وتحصل على الترخيص وهذا امر مكلف جدًا وانت خارج كندا، نظرا لانك تقوم بالسفر الي كندا لاداء الامتحانات وحضور الكورسات وتذاكر الطيران وتكلفة الاقامه من فندق واكل وشرب.
وبعد النجاح بتشوف مقاطعة وتدور فيها على عقد عمل كطبيب أسنان وفي الغالب بتكون مقاطعة بعيد جدا عن العاصمة وتسافر لكندا وتشتغل كطبيب أسنان، ممكن بعد فترة تنقل لمقاطعه تانية بس مشكلة الطريقة دي بتكون مكلفة جدًا علشان انت بتعمل معادلة الاول.
الحصول على فيزا الدراسة في كندا.
بالنسبة لينا كدكاترة اسنان فيزا الدراسة في كندا، المتاح لينا دراسة الماجستير في التخصصات النظري فقط مثل الاورال بيولوجي او الاورال باثولوجي وبعد ما تخلص الماجستير بتاخد فيزا عمل لمده سنه علشان تلاقي شغل، دي ممكن تكون بمنحة.
وطبعا بعد ما تخلص مينفعش تشتغل طبيب أسنان هتشتغل حاجه في مجال التدريس في الجامعة زي مساعد لدكتور في الجامعة او بتعمل ابحاث في الجامعة.
في فيزا دراسة تانية ممكن تقدم عليها بس مش بمنحة ولازم فلوس، فيه منظمه في كندا اسمها prep doctor عملت تعاون مع جامعه في اونتاريو بتدي كورس administration والمنظمه بتدي كورس لإمتحان ال afk اللي هوا اول امتحان في المعادلة الكندية لطب الأسنان وحصل دمج للكورسين وتقدر تقدم علي فيزا دراسة ليهم.
بتتخرج من الكورس تشتغل في مجال الأسنان، كاستقبال في عيادة وبتكون جاهزه لاول امتحان في المعادلة، بس مشكلة الخطوه دي انها مكلفة جدًا ممكن توصل لـ 60 الف دولار كندي ومنصحش بيها غير اللي كل الطرق قفلت في وشه وعايز يهاجر ومعاه مبلغ.
عيوب فيزا الدراسة في كندا :-
- بتحتاج مبلغ كبير علشان الدراسة غالية
- ملكش دعم مادي من الحكومه علشان انتَ مش pr (ممعكش الاقامه الدائمه)
تقديم اللجوء الى كندا!
تقديم اللجوء الى كندا بيكون للناس اللي عندها مشاكل في البلد الام واللي اهم نقطه فيه ان حياتك في خطر في وطنك الام ومعاك مستندات بتثبت كده، وتكون كاتب قصة قوية وعندك رد علي كل الاحتمالات.
لو تبين عدم صحة ادعائك او الادله غير كافيه وغير منطقيه بتاخد بلاك ليست خمس سنين ممنوع من دخول البلد، وكمان لو اللجوء اتقبل ممنوع تنزل بلدك الام لمده 10 سنوات.
ممكن تقدم للجوء لو انت في كندا بفيزا سياحه وممكن من خارج كندا وحوار اللجوء لينا كمصرين بيكون صعب جدا هوا كويس للناس السورين والسودانين
نظام ال Express entry؟
ده يعتبر أفضل نظام هجر لكندا وهوا express entry، ده نظام الحكومه الكندية عملتة للهجرة لجلب الأشخاص اصحاب المعارة العالية الى كندا، وبيكون عبارة عن نظام بيقيم وضعك من السن والتعليم واللغة والخبرة في العمل والزواج وعلى حسب التقيم بتاخد نقاط.
وفي نهاية كل رواند الحكومه بتختار مجموعه من ناس اللي نقاطهم عدت مستوي معين وتبعتلهم دعوه علشان يجوا كندا، ويبدا في المعيشة في كندا.
نظام النقاط في ال Express entry!
بالنسبة للنقاط المجموع الكلي للنقاط هو 1200 نقطة :-
- منهم 600 نقطة لترشيح المقاطعات أو الحصول على عقد عمل بكندا.
- أما بقية ال 600 نقطة فهم لبقية العوامل التي ذكرناها سابقا من العمر والتعليم واللغة والأقارب بكندا وخبرة العمل ... الخ
ويمكن حساب نقاطك من الموقع الرسمي من هنـــــــا، وبعد سنفكر في كيفية زيادة نقاطك، حاليا الحد المطلوب في اخر راوند كان فوق ال 480 للغة الإنجليزية وفوق ال 350 للغة الفرنسيه.
وفيه كمان ميزة خاصة بينا كأطباء أسنان البكالوريوس يعامل كماجستير في النقاط بمعني، انت معاك بكالوريوس أسنان لكن لما بتقدم للهجرة الشهاده بتتحسب ماجستير وبتاخد نقاط اعلا.
ما هوا نظام ترشيح المقاطعة في كندا؟
ده نظام اتعمل للعماله بشكل اكتر اللي معندهاش القدرة على المنافسة في اللغة والتعليم بالنقاط، كلنا عارفين ان كندا عبارة عن ولايات فكل ولاية عندنها نظام ترشيح بتبعت دعوه لاكتر عمال محتاجها في الولاية عندنا.
كل ولاية عندها نظام ترشيح مقاطعة وعندها الشروط الخاصة بيها وعلشان تلاقي ترشيح مناسب ليك لازم تخش نظام ترشيح المقاطعة اللي انت عايز تسافر ليها، لينكات ترشيح المقاطعات كلها من هنـــــــا.
بتشوف شروط المقاطعة اللي عاملة الترشيح ولو منطبقة عليك هتقدم وبتدفع مبلغ 1500$ لو جالك الترشيح، وورقه الترشيح بتتبعت بالايميل وبتزودك في نظام ال Express entry حوالى 600 نقطه.
طبعا المهن المطلوبة في ترشيح المقاطعات بتكون المهن اللي مش محتاجه معادلة للشهادة واكتر مثال مشهور هوا مجال IT إنما احنا ك دكاترة أسنان فرص ترشيح المقاطعة بتكون ضعيفة جدًا.
مقاطعة اونتاريو، لا يمكنك التقديم لهذا البرنامج مباشرة، كل ما تستطيع هو فتح ملف في الاكسبرس انتري وتحقيق شروطهم والانتظار على امل أن يختاروا ملفك ويرسلوا لك دعوة للتقديم، باقي المقاطعات بتقدم عادي.
التقديم الي برنامج Express Entry!
علشان تفتح حساب بنظام الـ Express entry، محتاج بشكل إجباري لوثيقتين مهمتين جدا وهما :
- شهادة اتقان للغة (إنكليزي أو فرنسي أو الاثنان معا)
- تقرير تقييم الشهادات العلمية (شهادة جامعية) من كندا.
اللغة:-
- شهادة ال IELTS والاختبار بيكون (general training) وليس أكاديمي والحد الأدنى للقبول هو 6 لكن هذه العلامة متدنية و عمليا لا تكسبك نقاط بالشكل المطلوب هي فقط تمكنك من فتح الملف فقط.
- شهادة ال TCF في اللغه الفرنسيه وعلشان تضمن إن يكون معاك نقاط كويسة من اللغة الفرنسية لازم مستوى اللغة عندك يكون B2 ده اقل شئ.
اللغة هي أهم عامل برفع النقاط و يمكن التأكد من ذلك بحساب النقاط مع ادخال علامات ILETS مختلفة كل مرة و رؤية الفرق الهائل الذي تحدثه العلامات العالية.
تقييم الشهادات:-
لابد من تقيم شهادتك التي حصلت عليها خارج كندا من جهة مختصة بهذا الامر وإسمها WES هذة الهيئة وظيفتها التاكد من أن الشهادة الخاصة بك حقيقية وليست مزورة وتستغرق هذه الخطوة من حوالي شهرين الى ثلاثة أشهر.
وبعد الدفع بيجيلك رقم إسمه Reference number ده مهم جدًا علشان الموقع يتعرف على شهاداتك اما تبعتها بالبريد.
الورق المطلوب بيكون في الغالب:-
- شهادة تخرج باللغة الإنجليزية.
- بيان درجات باللغة الإنجليزية مع تقدير المواد.
الورق بيتحط في ظرف منه الجامعه وعند اللزق بتاع الظرف يكون علية ختم الجامعه مع امضاء الموظف على الظرف من الخارج بجوار الختم وكتابه ال Reference number وعنوان ال WES من الخلف كما بالصور.
المفروض الظرف ده الجامعة اللي تبعته، بس الجامعات عندنا بعافية شوية فانتا هتاخد الظرف وتبعتة من أقرب بريد للجامعه لعنوان مؤسسة WES واللي هتلاقيه على الموقع بتاعهم.
ساعات الجامعات الخاصة بتبعت الملف فاسالهم للتاكيد، وبعد شهرين تقريبا ال WES بترد عليك وتقولك ورقك تمام وبتبعت ورقه فيها Reference number دة المهم اللي بية هتقدر تكمل باقي إجراءات الهجرة.
فتح ملف Express entry!
لكي تفتح ملف Express entry يجب عليك انشاء حساب على موقع الهجرة الكندية و هو مجاني و يمكن إنشاؤه بسهولة عبر هذا الرابط.
بعد انشاء الحساب تقوم بالبدء بفتح ملف Express entry و ادخال بياناتك و معلوماتك بالتفصيل من:-
- الاسم، العمر، رقم جواز السفر و صلاحيته، تاريخ الميلاد، الجنسية، بلد الإقامة، عدد أفراد الأسرة، مستوى تعليمك و شهاداتك و رقم تقرير تقييم الشهادات , مستوى لغتك و علاماتك بامتحان اللغة مع رقم الامتحان و تاريخه.
- عنوانك و ايميلك و تصنيف مهنتك حسب المعايير الكندية وعدد سنوات الخبرة و المسمى الوظيفي و هل لك أقارب بكندا و هل لديك عقد عمل بكندا و هل تم ترشيحك من قبل أي مقاطعة كندية للهجرة.
المبلغ المادي المطلوب:
من شروط الهجرة هي أن تكون قادر على اعالة اسرتك لمدة سنة كاملة بعد وصولك لكندا لذالك يجب عليك تقديم ما يثبت قدرتك على ذالك
- وقد حددت الحكومه الكندية المبلغ المطلوب 14690 دولار كندي لو كنت فرد واحد ولو اكتر من فرض المبلغ هيختلف وتقدر تعرف من الموقع الرسمي للهجرة عادي لو المبلغ متاح بالجنية المصري.
- بمرحلة فتح ملف Express entry كشف الحساب غير مطلوب ويكفي وضع مبلغ أعلى من الحد الأدنى المطلوب لكن بحال تم دعوتك للتقديم يجب عليك اثبات وجود المبلغ بإحضار الوثائق اللازمة من البنك.
وكده خلاص انت كملت ملف الـ Express Entry وعلى حسب نقاطك هيجيلك دعوه من الحكومه واسمها invitation to apply اللي اختصارها ITA.
ماذا بعد ITA أو ال invitation!
بعد ما تجيلك الدعوه (ITA) بتدخل علي ملف ال Express entry وبيكون مطلوب منك شوية أوراق بتاخدها اسكان وترفعها على الموقع وقدامك 90 يوم لاكمال، والأوراق دي بتكون :-
- شهادة التخرج بالانجليزي.
- بيان درجات بالانجليزي.
- شهادة الميلاد بالانجليزي.
- قسمه زواج بالانجليزي من العباسيه.
- باسبور بالانجليزي.
- كشف طبي في مستشفى معتمد، ولو عندك امراض مزمنه كسكر وغيره.
مفيش وقت محدد في ناس جاتلها الدعوه بعد أسبوعين وناس تانية قعدت بالشهور وكل ما كان الاسكور بتاعك عالي كل ما اتبعتلك دعوه بسرعه.
نصائح للقبول في برنامج ال Express entry!
- الطريق الاضمن في الهجرة الي كندا وهوا تعلم اللغة الفرنسية والحصول علي شهادة اثبات لغة بذالك وبكدا هتكون ضمنت الهجرة بنسبة 95 % اللغة الفرنسية مطلوب جدا في كندا.
- والطريق الاخر هوا الحصول على درجه عالية في اختبار اللغة الانجليزية ILETS تحصل على 8 في الاستماع وباقي الأقسام لا تقل درجتك عن 7 وبكده تكون نقاطك قوي بشكل كافي لاختيارك.
- لو انت نقاطك بين 400 و 500 اول ما تكون مؤهل لفتح حساب بمعني عملت تقيم ال WES ومعاك إمتحان لغة باي درجه كان، افتح حساب علطول علشان في بعض الروندانات بتنزل النقاط فيها فممكن تكون انت من بينهم.
واخيرًا أهم مكان لأخذ المعلومات و الحصول على النصائح هو الموقع الرسمي للهجرة الكندية ده المصدر الأساسي للمعلومات.
ولان الرفيق قبل الطريق دي جروبات على الفيس بوك مهتمه بالهجرة لكندا:-
- جروب Canadian Egyptian لصاحبة الاستاذ احمد الزعبي مهتم بالهجرة لكندا لو واقف معاك معلومه ومش لاقي اجابة وحابب تسال ناس مهتمه بالهجرة لكندا.
- جروب The road to NDEB للدكتور محمد موسي كما في الباسبور الكندي، دكتور اسنان هاجر لكندا وعايش هناك حاليا وبيساعد ناس كتير في الهجرة وخدوم جدا اللهم بارك، والكوميني أسنان فده مفيد لينا.
بعد ما انقبلت في برنامج ال Express entry وسافرت كندا واستقريت هتبدأ في خطوات معادلة طب الأسنان، وهناقش في المقال القادم معادلة طب الاسنان في كندا.
وهل يمكن إنك تشتغل dental assistant فترة لحد ما تعمل المعادله وهل ممكن تشتغل dental hygienist برضو واي المتطلبات لكلا منها، متنساش تشارك المقال مع اصحابك انا دكتور دينتيست سلام.