اتكلمنا في المقال اللي فات عن خطوات القيد بالنقابة لخريجين الجامعات الحكومية، وهنتكلم النهارده عن خرجين الجامعات الخاصة.
مبدئيا عشان تشتغل وتمارس طب الأسنان بشكل قانونى، حضرتك محتاج مستندين، المستند الاول هو كارنيه النقابة العامة لاطباء الاسنان والتاني هو ترخيص مزاولة المهنة. كل مستند منهم بيكون له اوراق هنتكلم عنها بالتفصيل.
طيب فترة القيد "فترة التقديم لإستلام كارنية النقابة وترخيص مزاولة المهنة" بإذن الله بتبدأ يوم 15 نوفمبر لحد 14 مارس، 6 شهور النقابة بتقبل فيهم الملفات لإستخراج كارنية النقابة، فإنتَ معاك وقت علشان لو ورقكك مش جاهز، وبيكون فيه فتره استنائية بتفتح في شهر 6.
إحنا محتاجين مستندين واحد للنقابة وواحد لوزارة الصحة، كل مستند منهم مطلوب لبعض الاوراق خلينا نعرفها كده انا مع حضراتكم فالمقال ده هنتكلم عن كل ما يخص جريج الجامعات الخاصة، ولو انتَ خريج جامعه حكومية او اجنبية او غير مصري، الورق ده مش بتاعك.
صووورة
خطوات التقديم فى النقابة العامة لاطباء الاسنان.
طبعًا وبدبهياً لازم تكون طلعت شهادة التخرج وشهادة الإمتياز علشان تعرف تقدم، والتقديم بيكون فى النقابة العامة لأطباء الأسنان وعنوانها (6 شارع الحديقة - جاردن سیتی - خلف دار الحكمة) وممكن تقدم فى النفابة الفرعية فى محافظتك، الموضع سهل وخطوات بسيطه إنشاء اللة:-
- دة الفيش والتشبيه، بيطلع من مركز الشرطه التابع ليك، بتروح تقولة عايز أعمل فيش موجهه للنقابة العامه لاطباء الأسنان، لازم يكون موجهه للنقابة لو مكنش مكتوب فية موجهه للنقابة العامه لاطباء الاسنان النقابة مش هتقبلة.
- ولازم الفيش يكون سارى، هوا بيكون ساري 3 شهور، وبتعملة فى يوم وبتروح تستلمه تاني يوم، وممكن تعملة مستعجل وتاخده فى نفس اليوم بس هتدفع فلوس رسوم أكتر.
- ملاحظة مهمة: إعمل إتنين فيش وتشبية واحد موجهه للنقابة العامه لاطباء الاسنان، وواحد موجهه لوزارة الصحه علشان هتحتاج وانتَ بتقدم على ترخيص مزاولة المهنة.
2- طباعة نموذج التسجيل.
- يتم الدخول علي موقع النقابة من الرابط التالـــــــــــــــــــــــــــى
- وإضافه بياناتك من الاسم والرقم القومي وتاريخ الميلاد .... الخ. مع "صورة الرقم القومي وجه أمامي - صورة الرقم القومي وجه خلفي - صورة شهادة التخرج - صورة شهادة الامتياز - صورة شهادة الميلاد - صورة صحيفة الحالة الجنائية - صورة شخصية رسمية بخلفية بيضاء - صورة شهادة الثانوية العامة" كل هذة الوثائق ممكن تكون بصيغة pdf او png او jpg ما عدا الصورة الشخصية تكون بإحدي الضيغ التالية jpg - png فقط.
- بعد ما بيتم إدخال البيانات والوثائق، بيظهر نموذج القيد الخاص بيك، بيتم طباعته والتقديم بية فى النقابة، يفضل إنك تسجل من خلال لاب توب تجنباً للمشاكل.
3- صورة موقف من التجنيد أو شهادة لمن يهمة الأمر"للذكور".
النقابة عايز تعرف موقفك من التجنيد اى؟ فإنتَ واحد من الـ3 دول:
- يا واخد إعفاء وطلعت الشهادة، بتقدم بصورة من الاعفا ومعاك الأصل للإطلاع.
- -يا ليك جيش ومشيت فى الإجراءات وكشف طبي وخدت الـ 110 فهتقدم بصورتها، مع الأصل للإطلاع.
- يا ليك جيش بس لسا مدلختش كشف طبى ومخدتش الـ 110 فبتطلع حاجه إسمها شهادة لمن يهمه الأمر بتبين موقفك من التجنيد.
الشهادة دي، بتطلع من مكتب التجنيد التابعه ليك بتطلع في خمس دقايق وبيكون مطلوب منك:
- صوره شهاده التخرج.
- صوره شهاده الامتياز.
- صوره شهاده الميلاد.
- صوره البطاقه.
فى مراكز بتذود دول فخدهم معاك احتياطى:-
- صوره شخصيه ٤ × ٦ خلفية بيضاء.
- بطاقه ٧ جند أو ٦ جند وصورة منها، ولو مش معاك ممكن تطلعا من منطقه التجنيد.
كل حاجه يكون معاك الاصل والصورة والظابط اللى بيطلع الورق بياخد الصور ويطلع على الاصل ويرجعهولك، والرسوم بتاعت الشهادة بتكون 30ج
- وبرضو لو إنتَ واخد إعفاء ومطلعتش الشهادة ممكن تجيب شهادة لمن يهمة الأمر من مكتب التجنيد.
4- اصل شهادة الثانوية العامة.
- لو انتَ ثانوية مصرية بتقدم اصل شهادة الثانوية، بتستلمها من الكلية وانتَ بتاخد ملفك، ولو لأى سبب من الاسباب شهادة الثانوية ضاعت بتروح بتطلع بيان درجات من الإدارة التعليمية، البيان لازم يكون أصل مختوم بختم النسر.
- لو انت ثانوي غير مصري بس مش ثانوي أمريكي، من الخليج او من السودان، بتقدم شهادة التخرج وشهادة الإمتياز فى النقابة وبتاخد خطاب تروح بية مكتب التنسيق فى عين شمس ومعاك أصل شهادة الثانوية الغير مصرية، وهما وهناك بيعادل الشهادة وبتاخد المعادلة دي تقدم بيها.
- لو إنتَ ثانوي أمريكي، للأسف مكتب التنسيق مش بيعادل الثانوية الأمريكية، بيتم معادلتها يدويا فى النقابة، فلازم يكون معاك أصل شهادة SAT، وشهادات المدرسه لـ grade 10 -12 وجواب التنسيق من الجامعه.
5- أصل شهادة التسلسل الدراسي.
بتجيبها فى حاله واحده بس لو سنوات الدراسة اكتر من 5 سنوات لازم تجيب الشهادة دي، بمعني:-
- دخلت صيدله سنه وبعد كده حولت أسنان خاص هتحتاج الشهادة.
- دخلت أسنان خاص من البداية بس وقعت سنه هتحتاج الشهادة.
- قعدت سنه من الدراسه بعد الثانوية مدخلتش كليه وجيت دخلت اسنان خاص هتحتاج الشهادة.
أو أي حاله تانية، إحسب انتَ خدت الثانوية سنة كام وسنه البكالوريوس كانت سنه كام، لو الفرق 5 سنوات انتَ مش محتاج الشهادة لو اكتر هتحتاج الشهادة.
توضيح اكتر!
مطلوب فقط للي دراسته اكثر من خمس سنوات دراسية يعني ثانوية قبل ٢٠١٧ وتخرج ٢٠٢٢ كده انتَ قعدت أكتر من خمس سنوات، لازم تجيب تسلسل دراسي من أول الثانوية العامة لحد التخرج.
- مثلا قضيت سنتين في صيدله و خمسه في اسنان هتجيب بيان قيد صيدله و تسلسل دراسي اسنان وهكذا لو بيطري او علوم هيا هيا.
طيب حضرتك ثانوية ٢٠١٧ و تخرج ٢٠٢٢ عادي بس غيرت الجامعه في النص هنا مش محتاج تسلسل دراسي و لا هتفرق معايا الا في حاله واحده بس و هي:
- إن مجموعك اقل من ٩٠% و دخلت جامعه زي سينا الاول لان سينا كان ليها استثناء مجموع ٥% والنقابة عارفة الكلام ده متقلقوش، هنا لازم تجيب تسلسل دراسي من الجامعتين و قرار المقاصه بتاع الجامعه التانيه.
- من الكلية بتاعتك عادي، بتقوله عايز تسلسل دراسي أو transcript وبتطلع فى ساعتها إنشاء الله.
طاب يا دكتور انا سحبت ملفى من صيدلية وأنا باقدم أسنان خاص هل هالاقي إسمي عندهم علشان أجيب القيد؟
- طبعًا إسمك بيكون هناك معاهم حتى لو سحبت الملف، وبيطلعلك بيان قيد إنك قضيت سنة أو اتنين عندهم.
6- اصل شهادة التخرج.
- أصل وليس صورة، خلى بالك.
7- أصل شهادة الإمتياز.
- أصل وليس صورة، خلى بالك.
8- أصل شهادة الميلاد.
- أصل وليس صورة، ويفضل تكون حديثه وموجود بيها الرقم الثلاثى.
9- صورة بطاقة الرقم القومي.
- يجب أن تكون البطاقة سارية، ميهنمناش البطاقه مكتوب فى الوظيفه إى، طالب او طبيب إمتياز أو بكالوريوس أسنان مش هتفرق، اهم حاجه تكون سارية.
- بس البطاقه لو مكتوب فيها طبيب أسنان فقط مش هتفع يعني بتاع السجل المدني وانت بتطلع بطاقه فى الإمتياز كتب طبيب اسنان بدل من طبيب امتياز اسنان، كده هتحتاج تغيرها.
تغير البطاقه سهل وممكن تتطلعها فوري لو مستعجل بتاخد شهادة التخرج وشهاده الإمتياز وصورة منهم، وبتطلع تاخد إستمارة من السجل والموظف بيطلع على الشهادة وبيطلع البطاقه وبيكتب المسمي الوظيفي بكالوريوس طب الفم وجراحه الأسنان.
10- عدد 2 صورة شخصية 4 × 6 خلفية بيضاء.
11- تقديم الأوراق بالنقابة ومن ينوب عنك.
يتم تقدم هذة الأوراق من الطبيب نفسة، أو من ينوب عنة بتوكيل رسمي موثق بالشهر العقاري، وتكون صيغه كالتالي:
- توكيل (لفلان) أن ينوب عني في التعامل مع النقابة العامة لاطباء الاسنان ووزارة الصحة وإدارة التراخيص.
- لو إنت مسافر ممكن تعمله من السفارة من عندك وتبعت DHL بس أصل.
10- رسوم التقديم بالنقابة.
- رسوم التقديم بالنقابة بالنسبة للخريجين المصريين من الجامعات الخاصة، بتكون 1850 جنيها مصرياً، وبتاخد إيصال إنك دفعت تقدم بية على ترخيص مزاولة المهنة.
خطوات التقديم للحصول على ترخيص مزاولة المهنة!
بعد ما قدمت فى النقابة بتاخد ايصال اشتراك النقابة وبتطلع على وزارة الصحة علشان تطلع ترخيص مزاولة المهنة وترجع بنسخة منه للنقابة تاني، والاوراق بتاعته بتكون:-
1- طلب ترخيص مزاولة المهنة - نموذج صحه (13).
- ده نموذج بتستلمة من ووزارة الصحه وانت بتقدم على الترخيص وبتملاة وانتَ هناك.
2- صورة بطاقة الرقم القومى.
3- صورة شهادة الميلاد.
4- أصل شهادة التخرج.
5- أصل شهادة الأمتياز.
6- عدد 2 صورة فوتوغرافية 6X4 حديثة.
7- صورة موقف التجنيد للذكور.
- نموذج 110 أو شهادة لمن يهمه الأمر أو شهادة الاعفاء زى ما قولنا فوق، صورة وليس أصل.
8- صحيفة حالة جنائية.
- الفيش والتشبيه، لو تفتكر فزق أنا قولتلك تتطلع إتنين فيش وتشبية علشان هتقدم واحد منهم فى وزارة الصحة، الفيش بتاع وزاره الصحة يكون موجهه لوزارة الصحة علشان يتقبل منك.
- ممكن تستنغني عن الفيش والتشبيه بتاع الوزارة وتجيب مكانها شهادة حسن سير وسلوك من الجامعه بتاعتك.
9- إيصال اشتراك النقابة.
- بعد ما بتقدم في النقابة بتاخد إيصال إنك دفت الرسوم بتاعت النقابة، فبتقدم الوصل ده فى وزارة الصحه وانتَ بتقدم على الترخيص.
9- رسوم استخراج ترخيص مزاولة المهنة.
- الرسوم تقريبا مش اكيد 200ج، هاتأكد وهاعدل المعلومة.
ملاحظه هام جدًا.
- بعد ما بتخلص وتسليم ترخيص مزاولة المهنة، بيكون معاك 3 نسخ فية نسخه منهم لازم ترجع بيها للنقابة علشان أستكمال إجراءات إستخراج الكارنيه، ولو مرجتش بالترخيص دة للنقابة ورقكك هيتركن ومش هيتكمل.
دى صورة من صفحة النقابة للورق المطلوب:
اسئلة شائعه!
س: هل ينفع اقدم في نقابة فرعية؟
- نعم بينفع عادي بنفس الورق بتفس كل حاجة، وكمان بتقدم لترخيص مزاولة المهنه فى النقابة الفرعية وهيا بتلخص الورق مع وزارة الصحة وبتطلع الترخيص، وكلم النقابة الفرعية اتاكد انهم بيستلموا ورق علشان بعض النقابات بترفض وتقولك قدم في النقابة العامه.
- كل نقابة فرعية وليها نظامها ممكن ياخد ورق ترخيص المزاولة ويخلصوا وممكن يقولك لا قدم بنفسك في القاهرة بس الاغلب بيستلم الورق منك وهوا اللى بيخلصوة.
- لا مينفعش استلام الكارنية بيكون فى نفس المكان اللي قدمت فية يعني قدمت نقابة عامه هتسلم فيها قدمت نقابة فرعية هتستلم فيها.
س: النقابة فاتحه وبتستقبل الأوراق من الساعة كام؟
- يتم قبول الملفات من جميع الأطباء من الساعة 10 صباحاً وحتي الساعة 1:30 ظهرًا، وذالك طوال أيام الأسبوع ما عدا يوم الجمعة والسبت وساعات بيكون فيه فترة استسنئات والنقابة بتفضل فاتحه لحد 4 العصر.
س: هوا انا هاحتاج كام اصل لشهادة التخرج وأنا باقدم؟
- بتحتاح 2 اصل من شهاده التخرج و 2 اصل من شهادة الإمتياز واحده للنقابة وواحده للوزارة.
س:لو الموقع علق معايا وأنا باسجل وجيت أسجل تاني قالى الرقم القومى مسجل بالفعل تعمل اي!
بعد التسجيل و تقديم الاوراق لو الموقع علق و قفل معاك، مفيش مشكلة، متحاولش تسجل تاني لان الموقع هيقولك انك مسجل قبل كده بالفعل، قدامك حلين:-
- اما تبعت لمندوب الدفعه المكلف من النقابة الرقم القومي بتاعك و هيبعتلك إيميل بطلب التسجيل اللي هتطبعه.
- تروح النقابه و أستاذ محمود اللى بيستلم الورق منك هيطبعهولك مفيش مشكلة.
وبس كدة الورق بيتراجع وفى خلال من 3 أسابيع الى شهر وبيطلع الكارنية وحضرتك بتتبلغ بالمعياد بتاع إستلامه، والإستلام بيكون من الطبيب نفسة علشان بتحلف القسم وانتَ بتسلم الكارنيه.
وبالتوفيق يا دكاترة.