تابعتا على قناة التلجرام!

كيفية إختيار أجهزة عيادتك بطريقة مثالية؟

Dr dentist

  لو بتفكر تفتح عيادة، المقال دة مهمه جدًا ليك، هيعلمك إزاي تختار اجهزاتك بعناية ومعيار إختيار كل جهاز مع بعض الترشيحات اللى تسهل عليك ومتخلك محتار كتير.

الـ Dental unit أو اليونت.

اليونت هي أهم جهاز في عيادتك وأغلى حاجه ممكن تشتريها، فخلى بالك وانتَ بتشتري اليونت تركز على 4 حاجات.
Choosing dental unit
1- إختيار وكيل اليونيت: لان ضمان حقوقك بعد البيع من اختيار وكيل كويس، لأن ببساطة مفيش يونيت مبيحصلش فيها مشكلة وده لأنها خليط بين (الميكانيكا - السباكة - الكهربا) ففترة الضمان والصيانة هي الأساس الأول اللي تختار على أساسه اليونيت اللي هتجيبها، ودايما يا هات اللي متجرب بقاله سنين متجيبش موديلات جديدة لسا نازلة قريب.

2- المواتير والخراطيم: وهي من أشهر الاجزاء اللي بيحصل فيها مشاكل فدايما إختار يونيت يكون خراطيمها ومواتيرها مش صناعة صيني علشان متعانيش معاهم بعد كام سنة من الاستخدام.

3- الاضافات: فيه يونيت كتيره بتقدملك مميزات زي built in scaler و built in light cure وسخان للمياه اللي بتنزل من اليونيت، إبعد عن الإضافات دي كلها علشان الصيانه بتاعتها بتكون صعبه.
الإضافات ديتجيبها منفصلة افضل بكتير من الـ built in وسهل تعمل upgrade فى جهاز فيهم وتختار الاوبشن اللى هتساعدك فى الشغل.

 4- حوض اليونت: إتأكد إن حوض اليونيت بيتحرك، علشان العيان الـ old age والبيدو والعيان اللى وزنه زيادة شوية واختار الحوض بكون سيراميك مش شفاف، علشان الحوض الزجاج الشفاف شكلة مش بيكون لطيف مع اللى بيحصل فيه.


ترشيحات اليونيت اللي ممكن تجيبها بالترتيب:-
  1. Suntem
  2. Anly
  3. Zafdent
  4. RN بموديلاتها
  5. Gladent
فيه يونتات تانية 


الكومبريسور

 يعتبر عصب العيادة، فمتهملش فية علشان تستريح فى عياتك.
Choose compressor

تختار الكومبريسور على أساس اي
كتير من الدكاترة بتختار الكومبريسور على اساس اللترات بتاعته ودة مش صح، والافضل بنختار على اساس الكاتور بتاعة كام حصان.

علشان نعرف احتياجتك من الكومبريسور لازم تعرف مكوناته الاول:- 
  • الـ head ودة الماتور اللى بيضخ الهواء وبيتقاس قدرتة بالحصان.
  • الخزان لتخزين الهواء، وده سعتة بتتقاس باللتر، والـ head بتكون متصلة بالخزان دة علشان تخزن الهواء المضغوط. 
  • الصمامات متصلة بخزان الهواء علشان تخرجلك الهواء بالضغط المطلوب أو لتصريف المياه الزائدة الناتجة من عملية ضغط الهواء 
اختيارك بقى للكومبريسور لازم يكون حسب استخدامك 
أولا:- 
- عيادة متواضعة وعايز الكونترا بتورك مظبوط واليونيت تشتغل معاك بكفائة لازم يكون أعلى من ال1 حصان.

- حضرتك جراح وبتستخدم الهاى سكشن كتير علشان تحصل على كفاءة مع الكونترا والهاى ساكشن فمتقلقش عن الـ 1.5 حصان.

- حضرتك endodontics انصحكم بالـ 1.5 حصان علشان الاريجيشن بروتوكول بيحتاج سكشن عالى.


إختيار اللترات لخزان الهواء!
الخزان بيكون متناسب مع قوة الـ head يعني طالما الحصان عالي هتلاقي الخزان أكبر، عموما منصحكش بأي شكل من الاشكال الخزان يقل عن 30 لتر. 

الكومبريسور اللى ليها أكتر من head مناسبة
فيه أنواع من الكومبريسورز بيكون ليها اكتر من head ممكن اتنين او تلاته ودى مميزات ان زمن شحن الكومبريسور بيكون اقل بكتير من الهيد الواحدة فمبعتملش ازعاج لوقت طويل في العيادة.

هي كويسه بس غاليه وأنا بفضل الهيد الواحدة وده لانها ارخص في السعر بكتير ده غير ان مشاكلها أقل (من باب ان لو عندك 2 هيد فاحتمال ان واحدة فيهم تبوظ هيكون أعلى ووقتها الحمل هيكون على الهيد التانيه فهتحصل زميلتها)


نصائح للحفاظ على العمر الافتراضي للكومبريسور!
إهتم دايما بتفريغ الهواء والمياه من الكومبريسور قبل ما تقفل عيادتك علشان تخفف الحمل عن المحابس والصمامات بتاعته وخراطيم اليونيت فتطول من عمرها الافتراضي.

وتفريغ المياه اللي بتتكون نتيجة بخار الماء الموجود في الهواء فلما يتضغط بيتحول لمياه فده بتاخد سعة من خزان فلو عندك خزان 30 لتر وفيه 5 لتر مياه فانت خسرت حوالي 15% من سعتة.


ترشيحات من الاقل الى الأفضل "ليست دعاية وإنما عن خبرة شخصية" :- 
  • CX
  • elephant
  • crown
  • total
  • e press
  • zaf 
اهم حاجه تلاقيها في اي كومبوريسور طبعا الضمان اولا وبعد كده الـ head تكون نحاس وفيه control unite في حالات الـ over load و يكون ليه قطع غيار عشان لو لا قدر الله حصل حاجه تقدر تصلحه.

الاوتوكلاف

 (قلب كل عيادة) والجندي المجهول اللي مش بيشوفه المريض ولكن هو سر نجاحك لو راعيت ربنا فيه.

فية 4 حاجات لازم تاخد بالك منهم وانتَ بتشتري الاوتوكلاف
1- الكلاس: إما كلاس N أو كلاس B والفرق بينهم ببساطة هو وجود pump تقدر تسحب الهواء من غرفة التعقيم بحيث البخار يقدر يوصل لكل الفتحات في الالات اللي بتعقمها يعني class N مش بيعقم الحاجات المجوفة نهائي.

وللأسف فيه أوتوكلافات موجودة في السوق على إنها class B ولكنها في الحقيقة class N فإتاكد ان النوع اللي انتَ جايبه certified class B وواخد شهادة بده وتقدر تطلب الشهادات ده من وكيله.

أو فيه حاجه اسمها Tube test وهي بتكون خرطوم طويل ملفوف وفي اخره فيه مادة الIndicator اللي بتحس حصل تعقيم ولا لا والمفروض البخار يخترق كل الخرطوم ده ويغير مادة ال Indicator اللي جوه ده.

2-الضمان: وانت بتشتري الاوتوكلاف هنصحك نفس نصيحة اليونيت وهي اشتري الضمان قبل الجهاز ومتجربش أبدا حاجات جديدة. 

3- المادة المصنع منها الاوتوكلاف: إختار اوتوكلاف مصنوع من stainless steel نضيف لأن لو الاوتوكلاف مصنوع من الحديد مع الحرارة العالية وبخار الماء بيحصل صداء للحلة الداخلية بسرعة، وهيكون العمر الافتراضي للأسف قليل.

4- المضخة: يفضل المضخة بتاعته متكونش صيني لانها من أشهر المشاكل اللي بتحصل بتكون فيها.

نصائح للحفاظ على العمر الافتراضي للاوتوكلاف!
الصيانة الدورية: أى اوتوكلاف بيكون لية صيانة دورية لان من غيره شغلك في العيادة هيقف، إسال وكيل الجهاز المفروض صيانته الدورية تتم أمتا علشان تحافظ عليه وتزود من عمره الافتراضي 

اهتمامك بالمياه المقطرة اللي داخله للاوتوكلاف مهمة جدا وده السبب الخفي اللي بيبوظ معظم اجهزة الاوتوكلاف في عيادتكم وهنتكلم عن ده فى الجهاز القادم الديستلر.

الـ DISTILLER أو جهاز تقطير المياة.  

السر الأكبر فى زيادة عمر الاوتوكلاف. 

وهدفه إنه يسخن المياه اللي بنحطهاله مليانه بالمعادن والشوائب ويبخرها ويعيد بعدها تكثيفها وتجميعها وبكده تنزل مياه نقية من غير أي شوائب أو املاح وتترسب الاملاح ده في قاع الديستلر.

فلو إستخدمنا المياه بحالتها الطبيعية والاوتوكلاف بخرها علشان يعقم بالبخار بتاعها فوقتها الاملاح ده هتترسب في الاوتوكلاف وهتسد أنابيبه وهتسبب تاكل في المعدن بتاعها أو سدها!

وبرضه ترسيب الاملاح في الديستلر أمر اعتيادي وطبيعي ومش معناه ان المياه عندك محتاجه فلتر لان 99% من فلاتر المياه مش هتقلل الاملاح اللي في المياه 

اي ديستلر يفي بالغرض المهم انك تتأكد من كفائته وده بيتم عن طريق قلم بيقيس كفاءة المياه المقطرة الخارجه منه ونسبة الاملاح فيها  واسمة TDS measure pen وهو مش غالي بـ 100جنية تقريبًا.

الـ Scaler 

من أشهر الاجهزة اللي بيحصل فيها مشاكل للأسف واللي كتير بيسترخص فيها وبيحتاج يغيرها كل سنتين مثلا.

المهم في الإسكيلر اللي بتستخدمه إن الباور بتاعه ميقلش مع الوقت، وتأكد من أسعار التيبات بتاعته ومدي توفرها فى السوق، علشان متجيبش جهاز تيباته غاليه ومش موجودة.

الترشيحات: 
الـ Woodpecker UDS-A led جهاز عظيم وسعرة مناسب جدا والتيبات بتاعته رخيصة ومتوفرة بشكل كبير وعمر الافتراضي كبير وبيحافط على الباور بتاعه لسنوات، وبيجى معاة تيبات للـ activation للاندو وبيجي برضو معاة بعض قطع الغيار.

الـ TDS Ultramint scaler والـ Woodpecker S6 دول أجهزة جميل لو حبيت تعمل upgrade للـ Scaler وفقهم مميزات حلوة ومفيدة، بس مش هتحتاج الابجريد دة فى عياتك وانت لسا بادئ.

الـ light cure. 

اللايت كيور أهم من الكومبوزت، واحد من اسباب حساسية الأسنان إن اللايت كيور مش بيعمل complete cure للكمبوزت، فخلى بالك واشتري حاجه تعيش معاك.

إهتم أوي بجهاز اللايت كيور اللي هتجيبه لعيادتك لان للأسف كتير بيغفل عن النقطة ده وبيكون الجهاز مش كافي انه يعمل complete curing. 

أقل intensity ممكن نشتغل بيها هي 800 w/cm²
ومش بنقيس الـ Intensity بالسينسور اللي جاي مع بعض الأجهزة كهدية من الشركة لانها بتقرأ ارقام over rated وبيبقى الجهاز قاري فوق الالف والفعلي بتاعه 400 وهو الغير كافي للـ curing.

وممكن تتأكد من كفاءة الـ light cure عن طريق تجيب سرنجه كمبوزت نوع ردئ وتفتح الانبوبة وتسلط الـ light cure عليها وشوف كام ملي من الكومبوزت بقا ناشف لو أقل من 4 ملى يبقا للأسف الجهاز دة كفاءة مش مظبوطه.

ترشيحات: من الأجهزة العظيمة جدا هي الLed F أو premium plus ليهم intensity عاليه بحيث مهما قلت مع الوقت تكون كافيه وعمرهم الافتراضي فوق ال3 سنين حسب إستخدامك.

ودايما حاول تنظف التيب الزجاج بتاعه اللايت كيور لانها في أغلب العيادات بيكون لازق فيها composite فبالتالي بتصد الضوء الخارج منه فبتأثر تأثير كبير على الintensity 
ولو هتغلفها فيفضل استخدام الراب الشفاف (Cling Film) بحيث ميشتتش الضوء الخارج منه.

الامالجاميتور.

طبعا الجيل الجديد بيكرة الامالجاميتور كرة العمى، بس للأسف هوا من أساسيات العيادة، ومش هينفع نستغني عنة، حاليا بنستخدم فى كبسولات الجلاس ايونمر وغيرها.

ترشيحات:- 
- الـ Rockmix سعرة رخيص والكواليتي بتاعته محترمة وهيعيش سنين من غير مشاكل. 
- لو حابب تشتري أنواع تانيه اتاكد من ان الـ fork اللي بندخل فيها الكابسولات metal لانها شائع إنها بتكسر، وإتاكد كمان إن لوحة الزراير بتاعته مش ملزوقه بشكل سئ لانها بتتخلع بسهولة فكتير من الانواع.

كدة تقريبا أساسيات الأجهزة فى العيادة ومعيار إختيار كل جهاز، واستنونا فى مقال تاني بنشرح فية باقي اجهزة العيادة.


Cookie Consent
We serve cookies on this site to analyze traffic, remember your preferences, and optimize your experience.
Oops!
It seems there is something wrong with your internet connection. Please connect to the internet and start browsing again.
AdBlock Detected!
We have detected that you are using adblocking plugin in your browser.
The revenue we earn by the advertisements is used to manage this website, we request you to whitelist our website in your adblocking plugin.
Site is Blocked
Sorry! This site is not available in your country.